Tsakure:
Wannan muƙala mai taken “Mutuwa A Muryar Mamman Shata Katsina: Nazarin Wasu Waƙoƙinsa”, ta taɓo yadda Marigayi Alhaji (Dr.) Mamman Shata ya ambaci mutuwa a wasu waƙoƙinsa domin isar da saƙo ga masu sauraro. An saurari waƙoƙin Mamman Shata an jujjuya su a littafi a matsayin hanyoyin tattara bayanai. An ɗora takardar bisa Ra’in zalaƙa domin ta haskaka nazarin. Mutuwa jigo ne na wa’azi wadda mawaƙa (makaɗa, kamar yadda wasu masana suke ƙira) suke bayyanawa a cikin waƙoƙinsu da nufin cim ma burinsu. An nazarci wasu daga cikin waƙoƙinsa ta fuskar matakan nazarin waƙar baka, inda aka fi mayar da hankali kan manufar wannan muƙala. Sakamakon binciken ya nuna cewa, mawaƙin yana ambaton mutuwa ne a cikin waƙoƙinsa domin isar da saƙo ta fuskoki kamar haka: ta’aziyya da fatan alheri da jimami da ɗaukan hukunci a hannu da kuma bayyana ikon Allah. Muƙalar ana fata ta zama mai alfanu da muhimmanci ga manazarta waƙar Alhaji Mamman Shata da ma waƙoƙin baka na Hausa a jumlace.
Fitilun Kalmomi: Mutuwa, Mamman Shata, Nazari, Waƙoƙi
author/Babangida, A., Gadaka, H.U. and Aliyu, H.G.
journal/GNSWH, April 2024
